Studentrepresentasjon og fagutvalg

Fagutvala er faglege og fagleg-sosiale utval. Her kan alle studentar vere med, det er ingen avgrensing for kor mange som kan sitje i fagutvalet. Fagutvalet er basert på frivillig innsats, og gir nyttig erfaring. Det er til ei kvar tid medlemmane i fagutvala som i stor grad er med på å forme korleis fagutvalet fungerer og kva ein jobbar mest med. Er du interessert i å påverke fagmiljøet anten fagleg eller sosialt, er fagutvalet ein god stad å byrje!

Fagutvalet 

• tar vare på interessene til studentane ved faget
• tar opp eventuelle saker tilknytta eksamen, pensum, undervising og liknande direkte med studiekonsulenten ved faget og/eller fagkoordinator, eller i Instituttutvalet ved AHKR
• er bindeleddet mellom studentane ved faget og Instituttutvalet ved AHKR, administrasjonen og fagmøta 
• fremjar fagleg-sosiale aktivitetar ved faget ved for eksempel å arrangere:

- allmøte for studentane ved faget for å velje fagutvalet sine representantar og verv

- fagkritisk dag

- møter for fagutvalet for å planlegge semesteret og arrangementer 

- faglege arrangement, t.d. faglunsj 

- sosiale samankomstar, quiz etc

Instituttutvalet (IU) 

• Vel studentrepresentantar til UUI og Instituttrådet
• er det øvste studentutvalet på instituttnivå ved AHKR 
• opererer i stor grad som eit fagutval på instituttnivå 
• er ei samla stemme for alle studentane ved AHKR til administrasjon og ledelse
• arbeider for økt samarbeid mellom faga ved instituttet
• fungerer rådgjevande for fagutvala
• handterer eller vidareformidlar saker som er for store for fagutvalet, eller som tilhøyrer instituttnivå 
• held sosiale arrangement for alle fag ved instituttet

Fagmøta ved instituttet er knytt til dei ulike fagmiljøa. Her sit dei fagleg tilsette, studierettleiar og representantar for studentane. Fagmøta for kvart fag har ansvar for studieprogrammet si oppbygging, pensum, eksamen, undervising og andre saker på fagnivå. 

I UUI sit undervisningskoordinator og fagkoordinatorane ved AHKR. Studentane har krav på to representantar med røysterett i UUI. AHKR ønskjer samstundes at alle fire fag er representerte med student på møtet, og har difor ei ordning med fire studentrepresentantar – ein frå kvart fag – som kvar har ei halv stemme. Kvar representant skal ha ein vara. Instituttutvalet vel studentrepresentantar til UUI.

UUI har eit overordna blikk på studie- og emneplanar, bruken av tilgjengelege undervisingsressursar på instituttet, og arbeider for å oppfylla dei langsiktige og strategiske måla for undervising og internasjonalisering på AHKR. 

Instituttrådet består av representantar for dei fagleg tilsette, for administrativt eller teknisk tilsette, og for studentane. Studentane har to representantar i instituttrådet, som vert valde av Instituttutvalet. Kvar av desse skal ha to vararepresentantar. Sakane som vert tekne opp i instituttrådet vedkjem ulike sider ved drifta av instituttet, både faglege og meir administrative sider. Døme på dette er forskingsmeldingar, forskingsutdanningsmeldingar, utdanningsmeldingar, budsjett og rekneskap. 

Det er utarbeidd ei vitebok for alle fagutvala ved AHKR, som beskriv viktige rutinar og informasjon kring drift, økonomi, bestilling, kontaktpersonar ved instituttet m.m. Viteboka er eit verktøy for fagutvala, båe i overgangane mellom medlemmar og for å auke grunnforståinga av ulike prosessar innad i fagutvala.