Nordisk: Den nordiske språkgreina

Mål og innhald

Mål:

Emnet har som mål å gi studentane kunnskap om likskapar og skilnadar mellom dei nordiske språka i fortid og notid (islandsk, færøysk, dansk, svensk og norrønt, i tillegg til moderne norsk. Eitt av språka blir studert grundigare enn dei andre. Kva for eit språk som blir tematisert, vil variere frå år til år.

Innhald:

Emnet har to hovudtema:

(1) Ei generell oversikt over språk og språkforhold i Norden.

(2) Fordjuping i eitt av dei nordiske språka utanom moderne norsk. Emne som kan bli vektlagde, er grammatikk, uttale, ordtilfang, språkhistorie, sosial variasjon, geografisk variasjon og språkpolitikk.

I tillegg inngår lesing og omsetting av prosatekstar og opplæring i bruk av nettbasert ordbok og andre ressursar. Lengda på prosatekstane blir tilpassa den språklege avstanden mellom norsk og fordjupingsspråket, med kortare tekstar på islandsk, færøysk og norrønt enn på dansk og svensk.

Studenten skal ved avslutta emne ha følgjande læringsutbytte definert i kunnskap, ferdigheiter og generell kompetanse:

Kunnskap

Studenten

• har grunnleggande kunnskap om språk og språkforhold i Norden, og meir inngåande kunnskap om eitt av språka

Ferdigheiter

Studenten

• kan ved hjelp av ordbok og andre ressursar omsette ukjend prosatekst av moderat vanskegrad frå det språket som ein fordjupar seg i, til moderne norsk og kommentere grammatikk og ordtilfang

Generell kompetanse

Studenten

• kan utveksle synspunkt om og vurderingar av språk og språktilhøve i Norden