Arabisk språk med Midtaustens historie (bachelor)

Programmet er laga for studentar som ikkje kan arabisk frå før. Du får eit intensivt språkkurs i moderne standardarabisk frå null og opp til eit mellomnivå, og ei grundig opplæring i praktisk arabisk grammatikk og faglege hjelpemiddel. 

Vi har eit mål om å gi studentane ei teoretisk innføring i arabisk språkkunnskap (litteraturhistorie, språkhistorie, sosiolingvistikk og dialektlære). I tillegg skal du arbeide med tekstanalyse og omsetjing. Du skal evne å bruke arabisk språk på ein reflektert og kritisk måte og etter avslutta studium ha kompetanse til å vidareutvikle eigne språkkunnskapar. 

Du vil lære meir om Midtaustens historie og få kompetanse i bruk av historiske kjelder, teoriar og metodar. Ved å kombinere historie og arabisk språkkunnskap  får du styrka ferdigheiter og fordjupa kunnskap om Midtausten i heilskap. Du skal også reise ut på eit studieopphald til eit land i Midtausten. 

Det krev mykje arbeid og innsats å lære seg eit framandspråk, men du skal ikkje gjere alt på eigenhand.  Vi tilbyr fleire former for undervisning som legg til rette for læring:

• Førelesningar
• Seminarundervisning
• Individuell rettleiing
• Feltarbeid
• Språkskule

I undervisninga får du arbeidde med fagstoff og faglege problemstillingar, gjennom oppgåver, presentasjonar og andre studentaktive læringsformer. Vi lærar best saman og difor er mesteparten av undervisninga obligatorisk. Etter undervisninga er det tid for sjølvstudium (løyse oppgåver, lese pensum etc.). Du må sette av rikeleg med tid for å oppnå progresjon og kjenne på fagleg meistring. Programmet er difor å rekne som eit fulltidsstudium.

Vi kan tilby flotte undervisningslokale plassert i Bergen sentrum. Du har tilgang på lesesalar, grupperom, bibliotek og andre vrimleareal som innbyr til fagleg samarbeid. 

Programmet gir ei tverrfagleg kompetanse som kan vere aktuell å ta i bruk i arbeid med integrering eller i møte med personar frå arabiskspråklege kulturar. 

Arabisk språk og områdekunnskap kan med fordel kombinerast med andre fag for å oppnå ei bestemt spisskompetanse, til døme med historie, statsvitskap, sosialantropologi, religionsvitskap, informatikk eller norsk som andrespråk. 

Nokre aktuelle arbeidsplassar kan vere i:

• Offentleg forvaltning
• Diplomatiet
• Humanitære organisasjonar
• Næringslivet (turisme og handel)
• Journalistikk

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

Undervisningsspråk: Norsk and arabisk

Våre undervisarar underviser på norsk, engelsk og delvis på arabisk mot slutten av programmet. Mykje av faglitteraturen er skriven på engelsk og norsk og ligg på eit høgt akademisk nivå. Difor bør søkarar til programmet ha gode lese- og skriveferdigheiter og forkunnskapar i både norsk og engelsk.

Bachelorprogrammet i arabisk språk og Midtaustens historie er eit treårig fulltidsstudium som startar i august.

Studiet er lagt opp slikt:

1. semester:

ARA100 Innføring i arabiskfaget og moderne standardarabisk

Examen philosophicum - skuleeksamen eller seminarmodell

Fellesemne for HF-studentar 

2. semester:

ARA120 Arabisk grammatikk

ARA121 Omsetjing og praktisk bruk av arabiskfagets verktøy

ARA122 Arabisk sosiolingvistikk

3. semester:

ARA210 Arbeid med arabiske tekstar

HIM101 Oversyn over Midtaustens historie

4. semester:

ARA220 Kommunikasjon og språk i felt. I dette emnet skal studentane reise på eit studieopphald i om lag tre månadar til eit land i Midtausten.

5. semester:

Frie emne – vel blant alle opne emne ved UiB eller reise på utveksling. Dei som planlegg å søke om plass på masterprogrammet i historie bør ta 15 frie studiepoeng i historie dette semesteret. Du kan ta emne innanfor historie ved UiB eller gjennom utveksling. Sjå studieplanen for fleire detaljer. 

6. semester:

HIM250 Bacheloroppgåve i Midtaustens historie

HIS203 Teoriar, metodar og historiske kjelder

Vi oppmodar alle til å reise på utveksling i løpet av studiet og har hatt god røynsle med å sende studentar til The University of Jordan. Vi vil også nemne utvekslingsavtalen med Universitetet i København. Dei har fleire emne innanfor fagfeltet Midtausten-kunnskap.

Universitetet i Bergen har også avtalar med fleire universitet rundt omkring i verda. 

Sjå anbefalte utvekslingsavtalar

Med denne bachelorgraden kan du kvalifisere for opptak til masterprogrammet i historie ved UiB. Det føreset at du tar 15 frie studiepoeng i historiefaget i tillegg til spesialiseringa. På masterprogrammet i historie kan du fordjupe deg i fagfeltet Midtaustens historie.

Studieplan for Bachelorprogram i arabisk