Arabisk språk med Midtaustens historie (bachelor)

Eit studium i arabisk er eit intensivt språkstudium der du startar å lære arabisk frå null. Studiet omfattar fagfelt som historie, litteratur- og språkvitskap. Gjennom aktiv deltaking i undervisninga vil du kunne oppnå grunnleggande ferdigheiter i språket. Du lærar å forklare korleis språket er bygt opp og språkvitskapen om arabisk. Når nivået aukar vil du få høve til å studere arabisk i ulike samanhengar. For eksempel:  

• Kva skil dei ulike dialektane frå kvarandre?  
• Korleis er standardarabisk brukt i arabisk presse?  
• Kva slags utfordringar møter ein i omsetjing til og frå arabisk?  

Kjernen i faget er studiet av arabisk grammatikk. Det er viktig for rask utvikling av ordforråd, leseforståing og rettskriving. I tillegg vil du beherske translitterasjon (å omskrive ein tekst frå eitt alfabet til eit anna), ta i bruk ordbøker, og kritisk kunne vurdere bruken av digitale språkverktøy. 

Som student hos oss vil du ha det meste av undervisninga på Nygårdshøyden midt i Bergen sentrum.

Undervisninga skjer på norsk, engelsk og arabisk. Som student vil du i all hovudsak bruke norsk når du skal svare på språkvitskaplege problemstillingar eller skrive akademiske tekstar. Mykje av pensum er på engelsk. Arabisk vert brukt både i språktreninga og i språkstudiet, enten i arbeid med omsetting eller med analyse. Du vil få bruke mange arabiskspråklege kjelder henta frå bøker, musikk, aviser og anna. 

Arabiskstudiet er rekna for å vere eit av dei meir utfordrande studia. Du vil jobbe mykje saman med medstudentar og på eiga hand for å lære deg eit nytt og spennande språk. Som student på arabisk disponerer studentane eit eige bibliotek, og rommet vert ofte brukt til samarbeid mellom studentar. 

Kompetanse i arabisk språk og kultur er i seg sjølv ein viktig døropnar for arbeid opp mot personar med arabisk som morsmål eller med organisasjonar som har arabisk som arbeidsområde. Det handlar ofte om å vere eit kontaktpunkt mellom menneske og/eller ulike typar organisasjonar, og med ein bachelorgrad i arabisk språk kan din kompetanse vere nyttig for stillingar i fleire sektorar: 

• etterretning og diplomati 
• offentleg administrasjon 
• integreringsarbeid, både i offentleg og privat sektor 
• frivillige organisasjonar 
• privat næringsliv 

Du må dokumentere generell studiekompetanse utan tilleggskrav. Dette er eit krav for opptak til alle studieprogram.

Undervisningsspråk: Norsk and arabisk

Undervisninga skjer på norsk, engelsk og arabisk. 

1. semester

ARA100 Innføringskurs i arabisk språk og kultur (10 studiepoeng)   

EXPHIL Examen philosophicum (10 studiepoeng)   

EXFAC00SK Språkvitskap (10 studiepoeng)  

2. semester  

ARA111 Grunnkurs i moderne standardarabisk I (15 studiepoeng)  

ARA112 Grunnkurs i moderne standardarabisk II (15 studiepoeng) 

Vi bygger om programmet, og fleire detaljar om studiets oppbygging vert publisert fortløpande fram til søknadsfrist for opptak hausten 2025.

For å øve og spesialisere deg i arabisk er det naturleg å reise til Midtausten. Derfor reiser alle til eit land i regionen i eitt semester for ytterlegare intensiv språkopplæring. Vi har blant anna utvekslingsavtale med The American University in Cairo.

Sjå anbefalte utvekslingsavtalar

Du har moglegheit til å gå vidare på masterprogram i arabisk. Det einaste masterprogrammet i arabisk i Noreg er på Universitetet i Oslo.

Viss du vel å bruke 60 studiepoenga på historie i din bachelorgrad, vil du kunne søke opptak til masterprogrammet i historie her ved Universitetet i Bergen.

Studieplan for Bachelorprogram i arabisk