Studieplan for MASV-SANT Sosialantropologi, master, 2 år, haust 2024
Namn på grad
Dette masterprogrammet fører fram til graden master i sosialantropologi.
Omfang og studiepoeng
Studiet er toårig (120 studiepoeng).
Undervisningsspråk
Norsk/engelsk
Mål og innhald
Masterprogrammet har som mål å utdanne profesjonelle sosialantropologar som kan ta på seg oppgåver i samfunnet der det er behov for sosialantropologisk ekspertise. Programmet gjev studenten viktige ferdigheitar innan sjølvstendig og systematisk prosjektarbeid, kritisk tenking, og innhenting, tilarbeiding og framstilling av omfattande mengder kunnskap, både teoretisk og empirisk. Gjennom programmet tileignar studentane seg brei kompetanse på munnleg og skriftleg drøfting, både individuelt og i fellesskap. Feltarbeidet fremjar særleg studentane sin sjølvstende, kompetanse i kommunikasjon og kulturomsetjing, og evne til tilpassing og sosial samhandling. I tillegg til å gje studentane inngåande kjennskap til samfunnsvitskapleg kunnskap, forsking og debattar, gjev masterprogrammet i sosialantropologi òg ein spissa ekspertise innanfor geografisk region og sjølvvalt tema, som kan nyttast i studenten sin vidare ferd i arbeidslivet.
Fullført masterprogram legg òg grunnlag for opptak til doktorgrad og ein vidare forskarkarriere.
I løpet av studiet skal studenten setje seg inn i litteratur der faget sine holistiske og komparative ambisjonar og generelle metodiske og teoretiske tilnærmingsmåtar vert drøfta. Det sentrale arbeidet i studiet er masteroppgåva, basert på eit sjølvstendig planlagt og gjennomført feltarbeid som tek eit semester, over eit tema etter eige val. Masterstudiet i sosialantropologi tek sikte på å kvalifisere studenten til å gjennomføre eit sjølvstendig forskingsprosjekt som munnar ut i ei masteroppgåve.
Fyrste semester er samansett av tre ulike emne på 10 studiepoeng kvar. Studenten skal velje eitt av fleire moglege tematiske emne som spring ut av pågåande antropologisk forsking ved instituttet (SANT310-X). Tema og antal tilbydde emne varierer frå år til år. Vidare vert det halde eit obligatorisk emne på 10 studiepoeng (SANT300) som kastar lys over ulike sider ved forskingsprosessen, så vel metodiske som kunnskapsteoretiske. Begge desse emna munnar ut i skriftlege eksamenar, enten skuleeksamen eller heimeeksamen. Ved heimeeksamen vert det òg heldt munnleg eksamen.
Gjennom heile semesteret følgjer studenten òg eit prosjektutviklingsseminar (SANT302) som skal avsluttast med ein fagleg samtale og godkjent prosjektskildring (10 sp). I prosjektskildringa skal studenten greie ut om tema for oppgåva, kvar feltarbeidsmaterialet skal hentast inn, kva som er prosjektet sine sentrale forskingsspørsmål og teoretiske orientering, samt val av metode og etiske refleksjonar. Prosjektskildringa vert utvikla i samarbeid med rettleiar. Studenten vil få tildelt rettleiar så fort det er praktisk mogleg i starten av semesteret.
Feltarbeid (SANT320) er eit praktisk metodekurs som varer i eitt semester der studenten gjennomfører sjølvstendig antropologisk feltarbeid enten i Norge eller ein annan stad i verda etter dei sjølvvalte tematiske og regionale føringane som er definert i prosjektskissa. Studenten skal skrive minst ein fagleg feltrapport som rettleiar skal kommentere og godkjenne skriftleg. Snarleg etter heimkomst frå feltarbeidet deltek studenten i eit obligatorisk skriveseminar som er ein integrert del av SANT350. Det er obligatorisk å delta på minst eitt skriveseminar i både 3. og 4. semester. På bakgrunn av det empiriske materiale som er samla inn under feltarbeidet skriv studenten ei masteroppgåve (SANT350).
Læringsutbyte
Ein kandidat med fullført program skal ha følgjande totale læringsutbytte definert i kunnskap, ferdigheiter og generell kompetanse:
Kunnskap
Kandidaten
- kan analysere og presentere kunnskap om eit sjølvvald tema i lys av antropologisk teori
- har kunnskap om og kan nytte aktuelle teoriar, metodar og tolkingsmåtar innan antropologisk forsking
- kan utføre ein etnografisk forankra analyse av sosiale og kulturelle forhold
- kan fortolke, forstå og formidle ulike perspektiv på verda
- kan reflektere over metodiske og etiske sider ved eige forskingsarbeid
- har tileigna seg perspektiv og omgrep som er nyttige i forståinga av kulturelt mangfald
Ferdigheiter
Kandidaten
- kan planlegge og gjennomføre ei sjølvstendig vitskapleg undersøking, inkludert feltarbeid, innanfor ei gjeven tids- og ressursmessig ramme
- kan formidle innsikter om den regionen og tematikken som masteroppgåva handlar om
- kan nytte ulike teoretiske perspektiv i analyse av empirisk materiale
- kan bruke deltakande observasjon, intervjumetodar, bibliotek- og nettressursar til å samle og analysere forskingsmateriale og presentere resultat
- kan formidle faglege problemstillingar og analysar, både til spesialistar og allmenta
Generell kompetanse
Kandidaten
- kan arbeide sjølvstendig med prosjektutvikling
- kan utføre datainnsamling i nye miljø og handtere komplekse sosiale situasjonar
- kan handtere uventa situasjonar og dilemma under forskingsprosessen
- kan veksle perspektiv og stille nye spørsmål i lys av ny kunnskap
- kan utfordre vedtekne sanningar om kulturelle og naturgjevne skilnader og likskapar
- kan sjølvstendig gjere greie for og vurdere etiske og metodiske sider ved forskingsprosessen
- har evne til sjølvstendig kritisk tenking og bruk av analytiske omgrep og perspektiv
Opptakskrav
Bachelorgrad eller tilsvarande grad med 80-90 studiepoeng spesialisering i sosialantropologi.
Bachelorgradar frå UiB som kvalifiserer:
- Sosialantropologi
- Utviklingsstudiar med spesialisering i sosialantropologi
- Kjønnsstudium med spesialisering i sosialantropologi
Eksterne bachelorgradar som kvalifiserer:
- Sosialantropologi frå UiO, NTNU, UiT
- Sosialantropologi eller tilsvarande frå utlandet
Du må også ha (generelle opptakskrav):
- Snittkarakter på minimum C i spesialiseringa i sosialantropologi.
- Språkkrava i både norsk og engelsk for dette studieprogrammet dekker du med generell studiekompetanse, anten på grunnlag av norsk vidaregåande skule eller på annan måte.
Omfang masteroppgåva
Masteroppgåva utgjer 60 studiepoeng og blir skriven i løpet av dei to siste semestra av programmet. I oppgåva skal du gjere greie for dei tematiske, metodiske og teoretiske føresetnadene som arbeidet byggjer på. Det empiriske materialet som blir analysert, skal framstillast på ein oversiktleg måte, og i vurderinga av avhandlinga blir det lagt vekt på kunnskapar i komparativ etnografi og relevant teori. Arbeidet blir utført under rettleiing. Studenten har rett på i alt 15 rettleiingstimar under studieløpet. Dersom studenten går ut over den normerte studietida mister ho rett til rettleiing etter 5. semester.
Rekkefølgje for emne i studiet
Masterstudiet startar i haustsemesteret med at studentane skal ta tre emne. Studentane skal velje eitt av fleire emne om pågåande antropologisk forsking som vert tilbydd det aktuelle semesteret (SANT310-X, 10 sp). Vidare tar studentane eit felles emne i antropologisk teori og metode (SANT300, 10 sp). Gjennom heile semesteret følgjer studentane det felles emnet SANT302 (10 sp) der dei i dialog med forelesar, medstudentar og individuell rettleiar arbeidar fram ei individuell prosjektskildring. Prosjektskildringa må godkjennast før studenten kan begynne på feltarbeidet.
1. semester
Valemne:
Vel eitt emne om pågåande antropologisk forsking (SANT310-X, 10 sp). Emna du kan velje blant finn du på Studentweb.
Obligatoriske emne:
SANT300 Antropologisk kunnskapsproduksjon og etnografisk praksis
SANT302 Individuell prosjektutvikling
2. semester
SANT320 Praktisk metodekurs: Antropologisk feltarbeid
3. og 4. semester
SANT350 Masteroppgåve
Delstudium i utlandet
Dei fleste studentane velgjer å gjennomføre feltarbeidet utanfor Noreg sine grenser, ofte utanfor Europa. For mange studentar representerer feltarbeidet intense og gjevande møter med menneske viss sosiale og kulturelle føresetnader og materielle vilkår er svært annleis enn eins eigne. Difor bør den enkelte så tidleg som mogleg setje seg inn i kva for nokre utfordringar ein kan stå overfor - ikkje minst språkleg, og korleis ein best førebur seg på desse. Men uansett kor feltarbeidet vert gjennomført føresetjast det monaleg tilpassingsdyktigheit.
Det er det vedvarande nærværet i andre menneske sitt liv, og den deltakinga i andre sin praksis slik nærvær inneberer, som er typisk for antropologar sin arbeidsmåte og kunnskapstileigning. På denne måten inneberer det antropologiske feltarbeid ikkje berre ein fagleg fordjuping, men også ei tileigning hos studenten av stor bredde i forståinga av samfunnsmessige og kulturelle problemstillingar.
Arbeids- og undervisningsformer
Undervisninga vil normalt bestå av førelesingar og seminarundervisning i mindre grupper i kombinasjon med tilbakemelding på skriftleg arbeid undervegs i studiet.
Vurderingsformer
Emna som inngår i det anbefalte studieløpet bruker i all hovudsak ulike kombinasjonar av følgjande eksamensformer: essay/rapport, skriftleg og munnleg eksamen.
Karakterskala
Karakterar ved Universitetet i Bergen vert gitt på ein av to måtar; anten
- Som 'Bestått' eller 'Ikkje bestått', eller
- Som ein bokstav, etter skalaen A, B, C, D, E, F.
Bokstavkarakterar er det mest utbreidde.
Grunnlag for vidare studium
Med mastergrad i sosialantropologi kan ein søkje seg vidare på ph.d.-studier (forskarutdanning), både innan sosialantropologi og i enkelte tverrfaglege studium. Dersom ein har to undervisningsemne i graden sin kan ein med påfølgjande eittårig praktisk-pedagogisk utdanning også bli lektor.
Relevans for arbeidsliv
Sosialantropologar arbeider i mange ulike yrke, ofte i eit tverrfagleg samarbeid, og gjerne også i jobbar som krev internasjonal kompetanse og krysskulturell innsikt. Antropologar arbeider i den offentlege forvaltinga, i internasjonale organisasjonar, på forskingsinstitutt, universitet, museum og høgskolar. Meir spesifikt arbeider dei innan arbeidsmiljørådgiving, i helse- og sosialsektoren, i arbeid med flyktningar og innvandrarar, i bistandsprosjekt og innan miljøvern. I arbeidslivet er det sjeldan "ein antropolog" som vert tilsett, men derimot ein antropolog som har gjort feltarbeid ein viss stad og/eller har studert særskilde tema.
Evaluering
Alle studieprogram og emne blir evaluert i tråd med UiBs kvalitetssystem for utdanning.
Administrativt ansvarleg
Institutt for sosialantropologi
Fosswinckelsgate 6, 5007 Bergen
E-post: studieveileder.sosantr@uib.no
Telefonnr.: 55 58 92 63
Heimeside: http://www.uib.no/antro/