Universität Passau og Det juridiske fakultet (ERASMUS+ - 3. studieår)

Om avtalen

Kven kan søke

Denne avtalen kan nyttast av studentar på 3. studieår av masterstudiet i rettsvitskap.

Studieåra 2023/2024 og 2024/2025 kan avtalen også nyttast av studentar på siste studieår av masterstudiet i rettsvitskap (studentar på studieordninga av 2003).

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråket er tysk og engelsk. Tilbodet av engelskspråklege emne er stort nok til at ein kan fylle semesteret kun med emne som har undervisning på engelsk dersom ein ikkje beherskar tysk. I august, før semesteret startar, har universitetet tilbod om tyskkurs for utvekslingsstudentar. Dette finn du opplysningar om på denne nettsida.

Kva emne kan eg ta

Ved dette universitetet kan du ta juridiske emne som blir godskrivne som valemne på 3. studieår (2021-studieordninga) eller spesialemne på siste studieår i masterprogrammet i rettsvitskap (2003-studieordninga).

Oversikt over juridiske emne finn du på denne nettsida.

På denne nettsida kan du lese meir om dei ulike undervisningsformene ved University of Passau.

Vertsuniversitetet nyttar ECTS-systemet, og ein ECTS-credit er det same som eitt studiepoeng.

Det er ein føresetnad at emna du vel ikkje overlappar innhaldsmessig med emne du har teke tidlegare, eller planlegg å ta seinare ved UiB.

Studieavgift

Erasmusstudentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universität Passau blei etablert i 1973 og er dermed det yngste universitete i regionen nedre Bavaria. Universitetet har rundt 12 000 studentar og eit emnetilbod fordelt på fire fakultet og 39 ulike studieprogram. Universitetet har ein moderne campus eit stenkast frå gamlebyen i Passau. Med unntak av institutt for katolsk teoligi, er alle fakultet og institutt samla på ein og same campus langs éi og same gate. Dette gjer det enkelt for studentane å komme seg rundt på campus og til dei ulike bygga der forelesingar blir haldne i bygningane til andre fakultet.

Passau er ein by med om lag 50 000 innbyggarar som ligg søraust i Tyskland, på grensa mot Austerrike. Byen er også kjend som Dreiflüssestadt, "byen av dei tre elver", og mange elvecruise siglar ut frå Passau. Frå Passau kan du også følgja sykkelsti heilt til Wien langs keisar og kongeruta som er erklært som eit historisk kulturminne.

Bustad

Utvekslingsstudentar kan søke om studentbustad i "student halls" gjennom universitetet sitt internasjonale kontor. Det er ikkje nok bustader til at alle som ønskjer det blir tildelt rom, men internasjonalt kontor gjev og tips til korleis ein kan finne husvære på den private marknaden.