Karlstads universitet og Det juridiske fakultet (ERASMUS+ - 3. og 5. studieår)

Om avtalen

Kven kan søke

Denne avtalen kan nyttast av studentar både på 3. studieår og på siste studieår av masterprogrammet i rettsvitskap.

Om tal på plassar:

Det er to plassar til studentar på 3. studieår og to plassar til studentar på siste studieår.

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Det finst nokre få emne på engelsk. I tillegg kan ein ta emne som blir underviste på svensk.

Kva emne kan eg ta

Utvekslar du til dette universitetet på 3. studieår tar du juridiske emne som blir godkjente som valemne på 3. studieår.

Utvekslar du til dette universitetet på 5. studieår tar du juridiske emne som blir godkjente som spesialemne (10 sp) og fordjupingsemne (20 sp).

På denne nettsida finn du oversikt over emna på engelsk for utvekslingsstudentar. I tillegg er det mogleg å ta emne på svensk frå det ordinære svenske "juridik"-programmet.

Det er ein føresetnad at emna du vel ikkje har same innhald som emne du har teke tidlegare, eller planlegg å ta seinare, ved UiB eller på utveksling.

Studieavgift

Erasmusstudentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Karlstads universitet vart etablert i 1999 då den tidlegare Högskolan i Karlstad fekk universitetsstatus. Universitetet har om lag 10 000 studentar. På omlag 20 minutt syklar ein frå sentrum av Karlstad og ut til universitetcampusen som ligg litt utanfor byen.

Karlstad har nær 100 00 innbyggarar, og kvar tiande av dei er student. Dette set sitt preg på byen, og gjer Karlstad til ein verkeleg studentby. Karlstad ligg nær grensa til Norge, om lag 25 mil frå både Oslo, Göteborkg og Stockholm. Karlstad har ei koseleg og livleg sentrumskjerne med butikkar, galleri, shopping, restaurantar, kafear og pubar. Svenske studentar seier at Karlstad er ein av Sveriges "mysigaste" (koselegaste) studentbyar.

Bustad

Karlstads universitet tilbyr studentbustad til utvekslingsstudentar. Romma er møblerte og har eige bad, medan ein deler kjøkken med fleire andre.

Semesterinndeling

August til januar og januar til juni.