Julius-Maximilian-Universität Würzburg og Universitetet i Bergen (ERASMUS+ - CHARM-EU)

Om avtalen

Kven kan søke

UiB er med i den europeiske universitetsalliansen CHARM-EU, som er finansiert gjennom Erasmus+-programmet. I tillegg til UiB er følgande universitet medlemmer alliansen: University of Barcelona, Trinity College Dublin, Utrecht University, University of Montpellier, Eötvös Loránd University Budapest, Åbo Akademi University, Julius-Maximilians University Würzburg og Ruhr West University of Applied Sciences. Les meir om alliansen her: Home | CHARM-EU

CHARM-EU-avtalen med University of Würzburg er open for alle UiB-studentar, men det er visse avgrensingar knytt til odontologi, medisin og farmasi (sjå lenger nede). Merk at ein del emne har krav til førehandskunnskapar. Jusstudentar kan ikkje nytte CHARM-EU-avtalen med University of Würzburg, men skal i staden nytte juridisk fakultets avtale med Würzburg.

Når i studiet kan eg reise

Ta kontakt med studierettleiaren ved ditt institutt/fakultet for informasjon om utveksling og når det passar å reise ut i ditt studieprogram.

Språk

Offisielt undervisningsspråk er tysk, men det vert også tilbode nokre emne på engelsk.

Ein må ha B1-nivå i engelsk og B2-nivå i tysk.

Kva emne kan eg ta

CHARM-EU-avtalen med University of Würzburg er ikkje knytt til eit spesielt fagfelt, og så lenge ein er fagleg kvalifisert, kan ein velje blant emna som vert tilbode på bachelor- og masternivå. Merk at søknadar til odontologi, farmasi og medisin vil måtte vurderast av det enkelte institutt.

Hugs at du må få ei fagleg førehandsgodkjenning frå instituttet/fakultetet ditt ved UiB, slik at du får utvekslingsopphaldet innpassa i graden din.

Studieavgift

Erasmusstudentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Julius-Maximilian-Universität Würzburg blei grunnlagt i 1402, og er eit offentleg breiddeuniversitet med om lag 26 000 studentar. Det har ti fakultet, og er kanskje best kjent som heimuniversitet for nobelprisvinnaren Wilhelm Röntgen. Det har blitt brukt store summar på å restaurere dei gamle universitetsbygningane i sentrum etter omfattande bombeskadar frå andre verdskrig.

Würzburg er kjend som ein kultur og universitetsby. Han har om lag 130 000 innbyggarar og ligg søraust for Frankfurt, nære midten av landet. Byen har mange vakre bygningar og er elles kjend for å vere feststemd. Han hevdast å ha den tettaste konsentrasjonen av kneiper og uteplassar per innbyggar i Tyskland. I tillegg blir det arrangert festivalar og «vinfestar» på løpande band i sommarhalvåret.

Bustad

Universitetet samarbeider med den lokale studentsamskipnaden om å tilby bustad for Erasmus-studentar. Det kan vere vanskeleg å finne rimeleg prisa bustad i området på den private marknaden rundt semesterstart.

Semesterinndeling

Oktober - mars og april - august.