Universität Potsdam og Institutt for sammenliknende politikk (ERASMUS+)

Om avtalen

Kven kan søke

Studentar på programma i samanliknande politikk har fortrinn på plassane.

Søkaren må ha tatt minimum 60 studiepoeng ved utreise.

Når i studiet kan eg reise

Det er mogleg å søke for eitt semester eller eit heilt år. På grunn av semesterinndelinga er det ikkje mogleg å reise for berre haustsemesteret. Normalt reiser ein ut mellom tredje og sjette semester. Masterstudentar kan reise ut i andre semester.

Sjå instituttet sine nettsider for meir informasjon, råd og anbefalingar om utveksling.

Språk

Undervisningsspråka er tysk og engelsk. Det er anbefalt å ha språkkunnskapar tilsvarande B1-nivå (CEFR) i tysk.

Institusjonen tilbyr tysk språkkurs til utvekslingsstudentar. Lånekassen har eit eige stipend ein kan søke for å få dekt utgifter til førebuande språkkurs i utlandet.

Kva emne kan eg ta

Innreisande studentar blir ein del av Faculty of Economics and Social Sciences på Campus Griebnitzsee (som ligg nærast Berlin), og kan ta ei rekke emne på tysk og engelsk. Miljøet på Politics and Public Administration er leiande i Tyskland innan fagområdet Public Policy and Management, men dei tilbyr eit breitt spekter av statsvitskapelege emne. På denne nettsida finn du oversikt over emna.

Ein fulltidsstudent skal ta 60 ECTS per år. Dei fleste emna utgjer frå 6 til12 ECTS avhengig av kva for deltaking ein vel. Det er ein føresetnad at emna du vel ikkje overlappar i nivå eller innhald med emne du har tatt frå før, eller planlegg å ta seinare ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universität Potsdam blei grunnlagt så seint som i 1991, på grunnlag av ei samanslåing mellom to statlege høgskular i Brandenburg. Det er no det største universitetet i delstaten, med om lag 22 000 studentar, fordelte på fem fakultet og tre campusar. Den eine campusen ligg i palasset Sanssouci, som er eitt av universitetet sine mange praktbygg.

Potsdam har rundt 140 000 innbyggarar og ligg i delstaten Brandenburg, på grensa til den sørvestlege delen av Berlin. Byen har historisk bakgrunn som residens for adel og kongelege, men har elles aldri vore noko maktsentrum. Rundt byen fins eit fleirtal små innsjøar og naturlege landemerke. Byen er prega av universitetet og aktivitetar knytt til ei rekke uavhengige forskingssentre.

Bustad

Universitetet har eit velkomstkontor som hjelper internasjonale studentar i leitinga etter bustad. Dei fleste studentbustadane i Potsdam er drifta av den lokale studentsamskipnaden. Mange vel òg å pendle mellom Potsdam og Berlin. Togturen tek litt over ein halv time.

Semesterinndeling

Oktober - mars og april - august.

2017

2015