Universität Potsdam og Institutt for politikk og forvaltning (ERASMUS+)

Om avtalen

Kven kan søke

Studentar ved Institutt for politikk og forvaltning har fortrinn på å reise ut gjennom denne avtalen. Søkarar frå samanliknande politikk har fortrinn før søkarar frå andre samfunnsvitskapelege fagområde dersom det er ledige plassar. Du må ha tatt minimum 60 studiepoeng ved utreise. Det er mogeleg å søke for eit semester (berre vår/sommar) eller eit heilt år.

Når i studiet kan eg reise

For bachelorstudentart passar det normalt best å reise ut for eit heilt eller halvt år mellom tredje og sjette semester. For masterstudentar passar det best å reise ut i andre semester. På grunn av semesterinndelinga er det ikkje mogeleg å reise ut for berre haustsemesteret gjennom denne avtalen. Sjå instituttet sine nettsider for meir informasjon, råd og anbefalingar om utveksling.

Språk

Undervisningsspråka er tysk og engelsk. Det er anbefalt at studentar som skal følge undervisning på tysk har forkunnskapar tilsvarande B1-nivå etter EU sine retningslinjer for språkkompetanse (CEFR). Institusjonen tilbyr tysk språkkurs til utvekslingsstudentar.

Kva emne kan eg ta

Studentar som reiser ut gjennom denne avtalen blir tilknytt Faculty Economics and Social Sciences på campusen Griebnitzsee og kan velje blant ei rekke emne med tysk eller engelsk undervisningsspråk. Fagmiljøet knytt til politikk og offentleg administrasjon er leiande i Tyskland innanfor «Public Policy and Management», men det finst òg tilbod om eit breitt spekter andre statsvitskapelege emne. På denne nettsida finn du generell informasjon for innkomande studentar og på denne nettsida ei oversikt over emnetilbodet ved universitetet. Masterstudentar frå administrasjon og organisasjonsvitskap kan få eit spesialopplegg der dei deltek på to masterseminar som erstatning for emne dei elles skulle tatt ved UiB i utvekslingssemesteret.

Ein fulltidsstudent skal ta 60 ECTS per år. Dei fleste emna utgjer 6-12 ECTS, avhengig av kva type undervisningsdeltaking ein vel. Det er ein føresetnad at du vel emne som ikkje overlappar med emne du har tatt tidlegare, eller planlegg å ta seinare ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universität Potsdam blei grunnlagt så seint som i 1991, på grunnlag av ei samanslåing mellom to statlege høgskular i Brandenburg. Det er no det største universitetet i delstaten, med om lag 22 000 studentar, fordelte på fem fakultet og tre campusar. Den eine campusen ligg i palasset Sanssouci, som er eitt av universitetet sine mange praktbygg.

Potsdam har rundt 140 000 innbyggarar og ligg i delstaten Brandenburg, på grensa til den sørvestlege delen av Berlin. Byen har historisk bakgrunn som residens for adel og kongelege, men har elles aldri vore noko maktsentrum. Rundt byen fins eit fleirtal små innsjøar og naturlege landemerke. Byen er prega av universitetet og aktivitetar knytt til ei rekke uavhengige forskingssentre.

Bustad

Universitetet har eit velkomstkontor som hjelper internasjonale studentar i leitinga etter bustad. Dei fleste studentbustadane i Potsdam er drifta av den lokale studentsamskipnaden. Mange vel òg å pendle mellom Potsdam og Berlin. Togturen tek litt over ein halv time.

Semesterinndeling

Oktober - mars og april - august.

2017

2015