University of Minnesota og Det juridiske fakultet (BILATERAL - 5. studieår - LLM)

Om avtalen

Kven kan søke

Denne avtalen kan nyttast av studentar på siste studieår av masterprogrammet i rettsvitskap.

For å kvalifisere til LLM-studier ved University of Minnesota må du ha eit karaktersnitt på rein C eller betre, og du må ha fullført alle emne til og med 4. studieår.

NB! Det er berre mogeleg å starte på LLM-studier ved University of Minnesota i haustsemesteret.

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråket er engelsk. Studentar som har oppnådd karakteren 4 eller betre i engelsk frå videregående skule treng ikkje å avleggje TOEFL/IELTS-test.

Kva emne kan eg ta

Ved dette universitetet kan du ta ein LLM-grad. Ein LLM er ein eittårig mastergrad i juss, som gir ein grundig spesialisering innanfor eit bestemt rettsområde. Ein LLM sikrar (på visse vilkår) at ein kan få godksriving av heile 5. studieår, altså både spesialemne og masteroppgåve.

Ved University of Minnesota kan du velge mellom to ulike LLM-program, enten LLM in American Law eller LLM in Business Law. Du må velje kva for ein av desse to du ønsker før du tek til på University of Minnesota. Vel du LLM in American Law, kan du dessutan velge mellom følgande underspesialiseringar (sjå Optional Concentrations).

Kva for ein av desse spesialiseringane du ønsker, vel du undervegs i året etterkvart som du vel kva kurs du vil ta.

LLM-graden ved University of Minnesota består av 24 credits fordelt på to semester. Dette er fulltidsstudie og tilsvarer 60 norske studiepoeng. For å få ein spesialisert LLM må 17 av creditsa dine vere innan Business Law hvis du ønsker ein LLM in Business Law. I dei ulike spesialiseringane innanfor LLM in American Law, varierer kravet for dei ulike spesialiseringane: Mellom 12 og 15 credits må vera innanfor det bestemte rettsområdet du ønsker spesialisering innanfor.

Introduction to American Law (2 credits) er det einaste obligatoriske emnet i LLM-graden ved University of Minnesota. Dette vert undervist i august, før undervisninga i dei andre faga tek til. Emna ved University of Minnesota gir frå 2 til 4 credits, og talet på credits fortel deg óg kor mange timar undervisning du vil ha i dette faget kvar veke.

Emna blir underviste enten som "courses" eller som "seminars". Generelt kan ein sei at "courses" har eit breidt tema, mens "seminars" ser nærare på eit bestemt område innanfor eit større tema. Oftast er det slik at "courses" har skuleeksamen, mens ein i "seminars" skal skrive ei oppgåve. Det vanlege er å velge nokre "courses" og nokre "seminars" for å fordele arbeidsmengda utover semesteret.

For å oppnå LLM-graden er det óg krav om eit større skriftleg arbeid. Dette kan til dømes vere oppgåva ein skriv i eit av seminara. Ei slik oppgåve kan og tilsvare ei norsk masteroppgåve i omfang (12000 ord) og djupne, og ein kan dermed få godskriving av heile 5. studieår i masterstudiet i rettsvitskap når ein tek ein LLM ved University of Minnesota. For å kunne få godskriving for masteroppgåve må semesteret, sett under eitt, tilsvare 30 studiepoeng. Ein må difor også ta andre emne i tillegg slik at arbeidsbelastninga totalt er på 12 credits per semester.

På denne nettsida finn du oversikt over LLM-programma ved Minnesota Law School. Vidare finn du oversikt over kva fag du kan velge blant.

Det er ein føresetnad at emna du vel ikkje overlappar innhaldsmessig med emne du har teke tidlegare, eller planlegg å ta seinare ved UiB.

Studieavgift

Gjennom denne avtalen må ein betale skolepengar. Ordinære skolepengar for studieåret 2025/2026 er estimert til 60 100 USD.

Studentar frå Bergen får 58% rabatt på skolepengane i form av eit "scholarship" frå University of Minnesota, og betaler dermed 25 242 USD.

I tillegg kjem obligatoriske avgifter og forsikring (for 2025/2026 er desse estimert til 6 450 USD).

Lånekassen gjev støtte til skolepengar. University of Minnesota er på Lånekassens liste over lærestader som kvalifiserer for utvida stipend studieåret 2024/2025. Det betyr at om ein utvekslar til University of Minnesota blir ein større del av skolepengestøtten gjeve som stipend samanlikna med det som er vanleg.

Ein skal òg registrere seg og betale semesteravgift ved UiB for heile den tida ein er ute.

Om forsikring:

Ved amerikanske universitet er det oftast eit krav at studentane kjøper helseforsikring gjennom universitetet. Prisen på helseforsikringa ved vertsuniversitetet ditt finn du på nettsidene til vertsuniversitet ditt. Dersom du har kjøpt eiga forsikring for studentar i utlandet, slik UiB på det sterkaste anbefaler alle å gjere, kan du prøve å søke om fritak (insurance waiver) frå universitetet si forsikring. Det er den enkelte student sitt ansvar å skaffe eiga forsikring og søke fritak (insurance waiver) ihht instruksane som blir gitt ved vertsuniversitetet.

Dei siste åra, etter at Norge og HELFO avslutta samarbeidet med den amerikanske forsikringsagenten Optum, har fleire studentar frå fakultetet erfart at det ikkje lenger er mogleg å få fritak. Studentar som ikkje får fritak, må sjølve betale for forsikringa ved vertsuniversitetet eller ei anna amerikansk helseforsikring med dekning på same nivå. Lånekassen gir ikkje ekstra støtte til å dekke denne forsikringa.

Om lærestaden

Om lærestaden og byen

University of Minnesota er eit av dei største offentlege universiteta i USA og vert også rekna blant dei mest prestisjefylte. Det er ranka blant topp seks av dei beste offentlege forskingsinstitusjonane i landet. Universitetet blei grunnlagt i 1851 og har i dag om lag 65 000 studentar fordelt på fire campusar. Universitetet har i dag om lag 3 800 internasjonale studentar frå 130 land. Hovudcampusen Twin Cities (UMTC) med sine 50 000 studentar fordelt på 17 ulike colleges og schools ligg i tvillingbyane Minneapolis og St.Paul. Det er først og fremst campusen i Minneapolis som er aktuell for studentar frå UiB. The International Student Orientation Program (ISOP) vert arrangert før kvart semester og er obligatorisk for alle nye internasjonale studentar. Her får ein høve til å bli kjent med universitetet og andre studentar, ein får hjelp til registrering og andre praktiske gjeremål i samband med semesterstart og informasjon om det å leve og bu i USA. Universitetet kan skryte av det 16. største biblioteket i Nord-Amerika. Størstedelen av campus har trådlaust nettverk som alle studentar kan få tilgang til ved å bruke sin University Internet ID og passord. For dei sportsleg interesserte er det nok av tilbod å velje mellom. Om ein trivst best som tilskodar kan ein følgje kampane til The Golden Gohpers frå tribuna, 11 jentelag og 11 gutelag innan idrettar som ishockey, friidrett, amerikansk fotball og basketball. Vil du trimme sjølv tilbyr universitetet topp fasilitetar. For 50-100 $USD per semester får du tilgang på diverse treningssenter, volleyball-, tennis-, squash-, friidretts- og fotballbaner og ein stor innandørs symjehall. På campus finn du i tillegg hundrevis av studentorganisasjonar som driv med alt frå argentinsk tangodansing til sjakk og fallskjermhopping. Du kan og bli medlem i den norske klubben.

Staten Minnesota har sterke skandinaviske band og dei mange nordmenn som utvandra og busette seg her set framleis sitt preg på samfunnet. University of Minnesota (UoM) tilbyr studiar i norsk, foreininga Sons of Norway har sitt hovudkvarter i Minneapolis og skulle du få lyst på norsk mjølkesjokolade og Solo er det ikkje så vanskeleg å få tak i. Noregs honorære konsul i Minneapolis er tidlegare visepresident Walter F. Mondale, som og var presidentkandidat for demokratane i 1984. Mondale si slekt kjem opphavleg frå Mundalen, eit dalføre i Fjærland i Sogndal kommune.Minnesota har hatt rykte som den trauste, solide staten i USA, full av folk med skandinavisk bakgrunn, og Minneapolis har ikkje akkurat vore forbunde med eit hektisk og trendy storbymiljø. Men det var før. De siste åra har byen vakna til liv. Det amerikanske trendbyrået Next Generation rangerer Minneapolis som den nest kulaste byen i USA - etter New York. Ein moderne storby som i dag står fram som eit kraftsentrum i midtvesten for kunst og kultur. Universitetet og dei mange studentane set og sitt preg på byen. Byen har ei framifrå teater- og musikkscene. Sentrum av byen blomstrar og ein kan i dag finne ei rekke butikkar, barar, pubar, restaurantar, kunstgalleri, museum, kinoar, teater og musikkscener downtown som gjer at byen er levande også etter arbeidsdagens slutt. Nye innvandrarar frå mellom anna Vietnam, Somalia og Latin-Amerika har blant anna gjeve byen nye kulturformer, nye impulsar, nye skikkar, nye butikkar og nye restaurantar. I løpet av året vert det arrangert mange festivalar i Minneapolis, alt ifrå humorfestival til kunstfestivalen Uptown Art Fair. Minneapolis vert rekna som sportsby nummer ein i USA og er er du glad i shopping kan du glede deg til å besøke det største kjøpesenteret i USA, Mall of America.

Bustad

Det fins ei rekke alternativ å velje mellom både on-campus og off-campus, og universitetet hjelper til med å skaffe bustad. Mange studentar finn ein plass å bu etter framkomst og universitetet tilrår deg å kome om lag tre veker før semesterstart for å ha tid til å finne ein plass å bu og få etablert deg før semesteret tek til.

Semesterinndeling

Det akademiske året går frå slutten av august til midten av mai. Det er delt inn i to semester med ein trevekers ferie i desember/januar, og eit sommarsemester frå juni til august. Det er som regel mogleg å søke om opptak både til semesterstart i august og i januar.

2023

2022

2020

2019

2018

2017

2016

2015