Kjønn, seksualitet og mangfald, årsstudium

Kva lærer du? 

Tematisk har kjønnsstudiet særleg fokus på samspelet mellom kjønn, seksualitet og mangfald, og ulike maktstrukturar i samfunnet. Vi undersøker også korleis kjønn, seksualitet og mangfald kjem til uttrykk i kunst og kultur. Du lærer å forstå og analysere kjønn, seksualitet og mangfald frå ulike teoretiske perspektiv, så som feministisk teori, skeiv teori, kritisk raseteori, interseksjonalitet, postkolonial teori og globaliseringsteori.  

Med eit årsstudium i kjønn, seksualitet og mangfald vil du få:   

• brei kunnskap om den samfunnsmessige, politiske og kulturelle betydninga av kjønn, seksualitet og mangfald i eit historisk, notidig og globalt perspektiv  
• ta i bruk kjønnsteoretiske omgrep og omgrep knytt til seksualitet og mangfald for å analysere samfunn og kultur 

Døme på spørsmål vi drøftar:   

• Kva er kjønn, kva er seksualitet og korleis kan vi tenke nytt om mangfald? 
• Kva ulike kulturelle forståingar av kjønn og seksualitet har vi? 
• Korleis endrar forståinga av kjønn seg over tid?   
• Kva betydning har ulike forståingar av kjønn, seksualitet og mangfald for kvart enkeltindivid og for samfunnet som heilskap? 
• Kva debattar er sentrale i diskusjonen av  kjønn, seksualitet og mangfald i dag? 
• Kan litteratur, film og kunst  vise oss nye måtar å tenke om kjønn, seksualitet og mangfald?  

Studiekvardag 

Dette er eit fulltidsstudium og baserer seg i stor grad på sjølvstendig arbeid. Ei vanleg arbeidsveke inneheld om lag 6 – 14 timar undervisning, fordelt mellom seminargrupper og forelesingar. Forelesingane går i all hovudsak føre seg på norsk, men pensumlitteraturen kan vere på både norsk og engelsk. I undervisninga vert det lagt til rette for at du er aktivt med i diskusjonane. Vi diskuterer dei sentrale teoretiske perspektiva og omgrepa som faget bygger på.   

Her møter du folk med ulik fagbakgrunn og mange blir inspirert av å lære av kvarandre og ikkje berre av faglitteraturen. 

Som student hos oss vil du ha det meste av undervisninga på Nygårdshøyden midt i Bergen sentrum. Du har tilgang til lesesalar, bibliotek, kollokvierom, treningssenter, kantine, kafear og student-bar på campus. På UiB finn du òg mange ulike studentorganisasjonar. Å vere med i ein studentorganisasjon er ei verdifull investering i studietida di - det gir deg mange erfaringar og venner for livet.    

Kva kan du jobbe som? 

Kunnskap om kjønn, seksualitet og mangfald er etterspurt kompetanse i mange yrke. Aktuelle jobbar er:  

• rettleiar for minoritetsspråklege   
• rekrutterar   
• rådgjevar for private verksemder og ideelle organisasjonar 
• administrasjonsansvarleg   
• lærar  
• forskar  
• rådgjevar innanfor studieadministrasjon   
• kommunikasjonsrådgjevar 

Opptakskrav og søknadsfrist 

For å søke dette studieprogrammet må du ha generell studiekompetanse.

Søknadsfristen er 15. April.

Studiets oppbygging 

Studieløpet kan sjå slik ut:

1. semester 

• Likestilling og mangfald (15 studiepoeng)  
• Oversikt over kvinne- og kjønnshistorie (15 studiepoeng)  

2. semester 

• Kjønn i det moderne (15 studiepoeng) 

Eitt av emna:  

• Kjønn, seksualitet og kultur (15 studiepoeng)  
• Familien i endring (15 studiepoeng) 
• Kjønn og litteratur (15 studiepoeng)  
• Kjønn og seksualitet i ein global kontekst (15 studiepoeng) 

Sjå oversikt over alle emne

Utveksling 

Det er ikkje mogleg å reise på utveksling på dette studiet. 

Vidare studiemoglegheiter 

Dersom du vil fortsette å studere, kan du søke om å bytte studieprogram til bachelorprogram i kjønnsstudium. Årsstudiet i kjønn, seksualitet og mangfald kan i sin heilskap inngå i bachelorprogrammet. 

Dersom du allereie har ein bachelorgrad, kan årsstudium i kjønn, seksualitet og mangfald gi eit godt grunnlag for ulike masterprogram i kjønnsstudium  

Spørsmål om studiet? 

E-post: studierettleiar@skok.uib.no

Studieplan 

Ein studieplan er eit formelt dokument mellom deg som student og Universitetet i Bergen. Studieplanen skal gi tydelege rammer for studiet, beskrive læringsmåla du skal oppnå og korleis studiet er bygd opp.

Les heile studieplanen

Søk her