Sykkelverkstad ved Studentsenteret

I samarbeid med Bergen Live og Miljøløftet set UiB opp sykkelverkstad ved Studentsenteret, torsdag 4. mai klokka 11-15. Her blir det også utdeling av gratis bollar og kaffe.

Når du finn sykkelen fram igjen etter ein lang vinter, kan det vere behov for å justere bremser og gir, eller kanskje treng kjedet smøring? Møt opp utanfor Studentsenteret - og få gratis hjelp av proffe sykkelreparatørar. Tilbodet gjeld enkel service, ikkje større reparasjonar.

Sykkeldagen markerer også at den nasjonale aktivitetskampanjen Sykle til jobben er i gang. Her kan man delta individuelt eller på lag - og vere med i trekninga av små og store premiar. Sykle til jobben varer i seks veker, frå 3. mai til 16. juni.

• Les meir om UiB si deltaking i Sykle til jobben 2023 og korleis du kan melde deg på her.

Sykkelvenleg universitet

Som del av satsinga Klimanøytralt UiB jobbar universitetet med å legge betre til rette for syklistar på universitetsområdet.  Med nær 20.000 studentar og 4000 ansatte, vil tiltak som fremmar miljøvenlege reiser til jobb og studier vere viktige tiltak på vegen mot målet om klimanøytralitet.

Grunna arbeidet med å legge til rette for syklistar på campus, vart UiB som første universitet i landet sertifisert som Sykkelvenleg universitet av Syklistenes Landsforbund i 2021.

Parkering og garderobar

UiB ønsker å gje tilsette og studentar gode moglegheiter for å sykle til og frå universitetet, og jobbar difor kontinuerlig med å etablere fleire trygge sykkelparkeringar og gode garderobefasilitetar rundt på campus.

Her finn du oversikt over UiB sine fasilitetar for syklistar, inkludert trygg sykkelparkering på universitetsområdet.