Erfaringar med videohøyringar i domstolane

Koronaviruset har sett fart på bruken av videomøte på arbeidsplassar verda over, og domstolane er ikkje noko unntak. Det er grunn til å tru at videohøyringar i domstolane vil bli vanlegare òg etter pandemien. Derfor arrangerte forskargruppa i rettsstat webinar om denne digitale omveltinga 14. juni.

I tillegg til norske tingrettsdommarar, deltok det gjestar frå Slovenia, England og Tyskland. Desse prominente juristane utveksla erfaringar med videohøyringar frå sine heimland.

Når ein plutseleg blir nøydd til å ta høyringar digitalt, er det nærliggande å tenka at utfordringane helst er av teknisk art, men det er ikkje berre teknikken som kan svikta. Menneskelege feil skjer også. Det hender til dømes at dommarar gløymer å skru av mikrofonen sin, og då kan vegen til inhabilitet vera kort. Dette er ein av utfordringane som John Sorabji er inne på i sitt innlegg om erfaringane frå England og Wales.

Nokre av dei øvrige utfordringane som stod på programmet var beskyttelse av data, ivaretaking av partsrettar og forholdet til EMD artikkel 6 om tilgangen til "public hearing".

Program:

• Velkomst v/ professor Ragna Aarli (UiB) og professor Eirik Holmøyvik (UiB).   
• Opningstale: rolla til dommarar under og etter korona v/ høgsterettsdommar i Slovenia, president i Europarådet og Europarådets dommarråd, Nina Betetto.   
• Erfaringar frå Noreg v/ dommarane Kjetil Myhrvold og Kristin Farstad frå Hordaland tingrett.   
• Erfaringar frå England og Wales v/ advokat og forelesar ved University College London, John Sorabji.   
• Erfaringar frå Tyskland v/ dommar André Wilkening og dommar Maike Hoffmann.   
• Problema med videohøyringar over landegrensene: eit tysk perspektiv som utgangspunkt for vidare diskusjon v/ juridisk direktør i det tyske justisdepartementet, Bärbel Kohake.   
• Felles diskusjon.   
• Avsluttande merknadar v/ Anne Sanders, professor ved Bielefeld University (professor II ved UiB).