Endeleg nytt masterprogram i kinesisk

Det har alltid vore eit mål for fagmiljøet å få oppretta eit masterprogram, og dette er noko studentane og har ytra ønske om. Fagmiljøet har gjort fleire uformelle undersøkingar blant studentane, der interessa for å ta master jamt over har vore høg.

Bachelorprogrammet i kinesisk er eit godt rekrutteringsgrunnlag til masteren. Bachelorprogrammet starta opp for første gong i 2013 – med ein tilsett på faget, Shouhui Zhao. Programmet hadde då opptak annakvart år. I 2017 blei faget styrka, og talet på tilsette gjekk opp til to då Guowen Shang starta på IF. Bachelorprogrammet fekk opptak kvart år. Opptaket av studentar til programmet har jamt over vore godt, og har hatt ein auke dei siste åra. 

Først i 2020, då faget blei styrka med ei stilling til, samt ein postdoktor, var forholda gode nok for å gå i gang med søknad om eit masterprogram. Søknaden blei jobba fram av heile fagmiljøet i kinesisk, som hadde gode støttespelarar i instituttleiing, studieadministrasjon, fakultet og UiB Læringslab. Arbeidet med søknaden blei ekstra styrka av engasjementet blant studentane.