Pris for framifrå undervisning til Edvin Schei
Professor Edvin Schei har fått pris på 500 000 kroner for framifrå undervisning innan medisin frå Olav Thon Stiftinga.
![Edvin Schei og Trond Viggo Torgersen](https://www.uib.no/sites/w3.uib.no/files/styles/content_main/public/media/edvin_og_trond_viggo_16-9_.jpg?itok=ZbOmJEem×tamp=1421324582)
Hovedinnhold
Professor Edvin Schei (Institutt for global helse og samfunnsmedisin) er tildelt Olav Thon stiftinga sin nasjonale faglege pris for framifrå undervisning innan medisin.
Stiftinga deler i år ut to prisar til forskarar som yter framifrå undervising av studentar innan det matematisk-vitskaplege og medisinske fagområde ved norske lærestader, og det er ein føresetnad for tildelinga at studentane også stiller seg bak forslaget.
Ein pioner
I ei pressemelding grunngjev stiftinga tildelinga med at Schei har vore ein pioner i å introdusere praksis og profesjonsøving tidleg og som ein integrert del av medisinstudiet ved Universitetet i Bergen. Han har bidrege til utviklinga av fyrstesemesterkurset i «Pasientkontakt», og til utviklinga av ei ny mentorordning med profesjonsgrupper der ynge studentar blir rettleia gjennom heile studietida.
Kunnskapsformidling
Som ein del av arbeidet med å formidle kunnskap om pasientkontakt og kommunikasjon mellom lege og pasient, har Schei nyleg gjeve ut boka «Lytt – Legerolle og kommunikasjon». Boka rettar seg mot både medisinstudentar og legar som ynskjer å utvikle seg i sin profesjon. Den tek også for seg legerolla og vil gje meir kunnskap om denne typen kommunikasjon.
Schei mottok prisen torsdag 5. mars.