Universidad de Santiago de Compostela og Det juridiske fakultet (ERASMUS+ - 3. studieår)

Om avtalen

Kven kan søke

Denne avtalen kan nyttast av studentar på 3. studieår av masterstudiet i rettsvitskap.

Studieåra 2023/2024 og 2024/2025 kan avtalen også nyttast av studentar på siste studieår av masterstudiet i rettsvitskap (studentar på studieordninga av 2003).

Når i studiet kan eg reise

Studentar som starta på det femårige masterprogrammet hausten 2021 eller seinare kan reise på utveksling i vårsemesteret på tredje studieår. Under utanlandsopphaldet tek du valfrie juridiske emne i staden for emna du ville studert om du var i Bergen.

I tillegg kan alle jusstudentar, både dei på femårig og dei på toårig masterprogram, reise på utveksling i sitt siste studieår. Under dette utanlandsopphaldet fullfører du spesialemna dine, og i nokre tilfelle også masteroppgåva.

Under overskrifta "kven kan søke" finn du ut om utvekslingsavtalen gjeld for studentar på tredje eller på femte studieår, eller begge.

Språk

Undervisningsspråka er galisisk og spansk. Ved juridisk fakultet er det først og fremst spansk som blir nytta som undervisningsspråk, men i nokre emne kan undervisaren snakka gallisisk. Det er opp til kvar enkelt forelesar kva språk han eller ho vil nytta. Gode språkkunnskapar spansk er naudsynt, og det er også lurt å venne seg til å forstå gallisisk sidan dette er språket mange av dei lokale studentane nyttar.

Universitetet krev at Erasmus-studentar har forkunnskapar i spansk tilsvarande minst nivå B1 etter EU sine retningslinjer for språkkompetanse.

Universitetet tilbyr språkkurs i galisisk og spansk for internasjonale studentar.

Kva emne kan eg ta

Ved dette universitetet kan du ta juridiske emne som blir godskrivne som valemne på 3. studieår (2021-studieordninga) eller spesialemne på siste studieår i masterprogrammet i rettsvitskap (2003-studieordninga).

Ei oversikt over juridiske emne finn du på universitetet sine nettsider.

Universidad de Santiago de Compostela nyttar ECTS-systemet, og ein ECTS-credit er det same som eitt studiepoeng.

Det er ein føresetnad at emna du vel ikkje overlappar innhaldsmessig med emne du har teke tidlegare, eller planlegg å ta seinare ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universidad de Santiago de Compostela er eit offentleg breiddeuniversitet i den autonome regionen Galicía, nordvest i Spania. Universitetet var lenge underlagt den katolske kyrkja, men blei fristilt og tok over mange bygningar frå kyrkja omkring midten av 1500-talet. Universitetet har i dag meir enn 45 000 studentar og er fordelt på to campusar. Den eine ligg i Santiago de Compostela, den andre i nabobyen Lugo.

Santiago de Compostela har om lag 100 000 innbyggarar og er best kjent for å vere byen der apostelen Jakob er gravlagd. Både byen og den mykje brukte pilegrimsvegen hit står på UNESCO si verdsarvliste og tydinga av bynamnet er «St. Jakob i Stjernens Egn». Lugo ligg ti mil unna Santiago og har om lag 90 000 innbyggarar. Denne byen er kjent for den romerske muren som omkrinsar gamlebyen, som også er oppført på verdsarvlista.

Bustad

Universitetet administrerer i alt seks studentbustadkompleks som er opne for søknadar frå internasjonale studentar. Det er òg mogleg å leige bustad på den private marknaden.

Semesterinndeling

September - januar og januar - juni.

2016