Universität Potsdam og Institutt for geografi (ERASMUS+)

Om avtalen

Kven kan søke

Avtalen gjeld i første rekke for studentar som går på bachelor- og masterprogrammet i geografi. Andre interesserte studentar kan òg søke, men blir prioriterte etter geografistudentane dersom det er fleire søkarar enn ledige plassar. Du må ha tatt minimum 60 studiepoeng før du kan reise på utveksling.

Når i studiet kan eg reise

Etter at du har bestått eksamenar tilsvarande 60 studiepoeng, kan du tilpasse utreisetidspunktet etter kva som passar med emna i utdanningsplanen. For bachelorstudentar tilrår vi utveksling i 4. og/eller 5. semester, når du kan ta emne som frie studiepoeng. Masterstudentar i geografi må legge eit eventuelt utvekslingsopphald til 2. semester og finne emne som kan erstatte spesifikke emne i kursdelen av masterprogrammet ved UiB.

Studentar frå andre studieprogram: Ta kontakt med studierettleiaren for programmet du går på for informasjon og råd om utveksling. Vanlegvis vil det passe best å reise ut i eit semester når du kan ta frie studiepoeng.

Språk

Undervisningsspråka ved universitetet er tysk og engelsk.

Dersom du ikkje har nok språkkunnskapar, finst det fleire måtar å førebu seg på før utvekslingsopphaldet. Sjå UiB.no for informasjon om språkkurs og språktandem. Hugs at eit utvekslingsopphald er ein unik sjanse til å skaffe seg språkkunnskapar du kan ha nytte av vidare i studia og i yrkeslivet.

Lånekassen har eit eige stipend ein kan søke for å få dekt utgifter til førebuande språkkurs i utlandet. Sjå universitetet sine nettsider for informasjon om eventuelle språkkurstilbod for utvekslingsstudentar i komande semester.

Kva emne kan eg ta

Institutt for geografi ved Universität Potsdam har fokus på desse fagområda:

• Samfunnsgeografi
• Geografididaktikk
• Geoinformatikk
• Naturrisiko
• Geoøkologi

Studentar som reiser ut gjennom denne avtalen kan òg velje emne frå andre fagfelt ved universitetet. Mesteparten av undervisninga skjer på tysk, men det finst og eit avgrensa tilbod om emne på engelsk.

Bachelorstudentar: Dersom du skal ta frie studiepoeng, kan du velje emne fritt innanfor det fagfeltet som avtalen gjeld for. Dersom du skal ta delar av spesialiseringa di i utlandet, må du velje emne som kan godkjennast som tilsvarande emne ved UiB. Det er ein føresetnad at emna du vel ikkje overlappar nivåmessig eller innhaldsmessig med emne du har tatt tidlegare, eller planlegg å ta seinare ved UiB.

Masterstudentar: Dersom du skal ta emne i kursdelen av mastergraden din, må du finne emne som kan godkjennast som tilsvarande, eller som erstatning for emne i kursdelen av 2. semester av masterprogrammet ved UiB.

Studieavgift

Erasmus-studentar betaler ikkje studieavgift ved vertsuniversitetet, men skal registrere seg og betale semesteravgift ved UiB for heile den tida dei er ute.

Om lærestaden

Om lærestaden og byen

Universität Potsdam blei grunnlagt så seint som i 1991, på grunnlag av ei samanslåing mellom to statlege høgskular i Brandenburg. Det er no det største universitetet i delstaten, med om lag 22 000 studentar, fordelte på fem fakultet og tre campusar. Den eine campusen ligg i palasset Sanssouci, som er eitt av universitetet sine mange praktbygg.

Potsdam har rundt 140 000 innbyggarar og ligg i delstaten Brandenburg, på grensa til den sørvestlege delen av Berlin. Byen har historisk bakgrunn som residens for adel og kongelege, men har elles aldri vore noko maktsentrum. Rundt byen fins eit fleirtal små innsjøar og naturlege landemerke. Byen er prega av universitetet og aktivitetar knytt til ei rekke uavhengige forskingssentre.

Bustad

Universitetet har eit velkomstkontor som hjelper internasjonale studentar i leitinga etter bustad. Dei fleste studentbustadane i Potsdam er drifta av den lokale studentsamskipnaden. Mange vel òg å pendle mellom Potsdam og Berlin. Togturen tek litt over ein halv time.

Semesterinndeling

Oktober - mars og april - august.

2017

2015