Interne reglement for studentlokalet Ad fontes

Rutinane vil vera eit tillegg til gjeldande regelverk for studentklubbar ved UiB, og omhandla lokale samarbeidsforhold mellom HF v/husstyret for HF-bygget, verneombodet og HSU.

Bakgrunnen for rutinane er vedtaket om at lokalet for studentklubben óg skal kunne nyttast av miljøa i HF-bygget (fakultetsstyresak 32/10).

1:  Ein representant for HSU vil gå inn som medlem i husstyret ved HF, der samarbeidssaker om studentklubben skal handsamast og avklarast. Medlemmane og fakultetet kan melde inn saker til husstyret, og leiar kallar inn til møte.  Samarbeidsrutinane vil bli kontinuerleg vurderte og evaluerte i husstyret, men endringar skal vedtakast i samarbeid med verneombod og fakultetet.

2:  HSU vil organisera og drifta eit tingingssystem der miljøa i HF-bygget kan søkje om bruk av studentklubblokalet. Det skal oppnemnast ein person ved kvart institutt (AHKR, LLE, IF FoF og Griegakademiet) som skal ta all tinging ved det aktuelle instituttet. Instituttet bestemmer sjølv kva person som høver til denne oppgåva. Lokalet kan ikkje nyttast utan godkjend søknad.

3:  Studentklubben har éin inngong, på baksida av HF-bygget, og denne skal nyttast både på dag- og kveldstid. 

4:  Studentklubben er godkjend for 95 personar.

5:  Samankomstar i studentklubben der lydnivået overstig normal kafédrift, kan ikkje ta til før kl. 20:00. Dette av omsyn til dei vitskapleg tilsette som ofte arbeider seint.

6:  Berre HSU har tilgong til kjøken og bar. Personale kan ev. leigast inn frå HSU.

7:  Lokalet skal forlatast i den same tilstanden som det vart funne. Gjenstandar (til arrangement o.l.) kan ikkje oppbevarast i lokalet utan løyve frå HSU.

8:  Dei interne samarbeidsrutinane skal evaluerast ein gong kvart semester i samarbeid mellom partane HSU, husstyret, verneombodet og fakultetet.