Søk om sommarstipend

Nytt: Tverrfaglege sommarstipend for studentar

I byrjinga av desember 2024 fekk Polyfon ei raus tildeling frå GC Rieber Fondene, slik at vi frå og med 2025 kan tilby 6 tverrfaglege sommarstipend for studentar med prosjekt relaterte til musikk og helse (sjå retningslinjene nedanfor). Dette vil vere stipend som studentar i ulike fagmiljø ved alle dei akademiske institusjonane i klynga kan søkje på. Per i dag gjeld dette studentar knytte til Høgskulen på Vestlandet, Noregs musikkhøgskole og UiB og også studentar som måtte vere knytte til aktuelle forskargrupper i NORCE. Desse nye stipenda vert lyste ut for første gong tidleg i januar 2025. Søknadsfrist vert 1. mars. Meir informasjon følgjer om ikkje lenge.       

Sommarstipend for studentar i musikkterapi eller musikk & helse ved NMH og UiB

I tillegg til dei 6 tverrfaglege stipenda, vil 2-4 sommarstipend vere øyremerkte til studentar i musikkterapi eller musikk & helse ved Norges musikkhøgskole og studentar i musikkterapi ved Griegakademiet (UiB).

Kva kan du søkje om?

Stipenda er på kr. 40.000 (trekkfritt inntil grensa for frikort) og svarar til 6 vekers fulltidsarbeid. Det er også mogeleg å søkje om halvt stipend på kr. 20.000, enten åleine eller saman med medstudent eller medforskar/brukarrepresentant (då gjeld 1 søknad per prosjekt). Moglege stipendalternativ:

• 1 fullt studentstipend på kr. 40.000
• 1 halvt studentstipend på kr. 20.000
• 2 halve studentstipend à kr. 20.000
• 2 halve stipend à kr. 20.000: 1 til student + 1 til medforskar/brukarrepresentant

Det er ikkje mogleg for avgangsstudentar å søkje.

Søknader og førespurnader om faglege råd sendast til polyfon@uib.no

Sjå gjerne denne oversikta over tidlegare tildelte sommarstipend.

Faglege retningslinjer

• Det fagfeltet kunnskapsklynga Polyfon arbeider med er musikkterapi / musikk og helse, så prosjekt må ha eit fokus på fysiske, psykiske, eksistensielle og/eller sosiokulturelle dimensjonar av aktuelle relasjonar mellom musikk og helse
• Folkehelserelaterte prosjekt i barnehage, skule og lokalsamfunn er like velkomne som prosjekt knytt til praksis innan helsevesenet 
• Klynga arbeider tverrfagleg, så det er ikkje eit vilkår at søkjaren skal kome frå musikkterapifaget, men uansett fagbakgrunn er det ein føresetnad av samarbeidsmogelegheiter er vurderte og at prosjektskissa aktivt byggjer på tilgjengeleg litteratur på feltet   
• Prosjektkvalitet er eit hovudkriterium ved vurdering, samstundes som det vert gjort ei heilskapleg vurdering ut i frå klyngas strategi
• Stipendet skal styrkje grunnlaget for vidare forsking og det er ein føresetnad at forskingsoppgåva ikkje erstattar arbeid med obligatoriske oppgåver ved studiet
• Prosjektet skal vere fokusert, avgrensa og mogeleg å gjennomføre innanfor ramma
• Søknader må vise at det blir lagt til rette for brukarmedverknad så langt dette er mogeleg og relevant. Polyfon sin rettleiar for brukarmedverknad gir informasjon om gode praksisar for brukarmedverknad
• Det er opning for ulike typar prosjekt, men prosjekt som kan leie fram til publisering og/eller utarbeiding av prosjektskisser for nye realiserbare prosjekt vil verte vurderte som særleg interessante
• Der det er relevant, vil søknader som legg til rette for tverrfagleg samarbeid også verte vurderte som særleg interessante
• For å få støtte, må studenten ha etablert rettleiingssamarbeid med ein forskar/prosjektleiar ved ein av Polyfons klyngedeltakarane
• Dersom arbeidsoppgåvene inkluderer datainnsamling og/eller -analyse, vil spørsmål om personvern, forskingsetisk godkjenning, databehandlingsavtale og liknande måtte vurderast og det må gå klart fram av søknaden at prosjektansvarleg klyngedeltakar tar ansvar for at dette vert tatt i vare etter regelverket 

Formelle krav til søknad og rapportering

Søknader er digitale. Bruk det skjemaet du finn i faktaboksen til høgre.

Som det går fram av skjemaet, skal søknadene m.a. innehalde: 

• Personalia på student og rettleiar
• Kopi av ein e-post frå rettleiar, som stadfestar at hen vil vere rettleiar (dersom studentens arbeidsoppgåver vil inkludere datainnsamling og/eller -analyse, må rettleiar også stadfeste at forskingsetiske og formelle problemstillingar knytte til dette vert tekne i vare av den aktuelle klyngedeltakaren)
• Prosjekttittel
• Ei prosjektskisse på ca. 1200 ord, med presentasjon av bakgrunn for prosjektet, problemstilling(ar), teori, metode, og etiske aspekt
• Beskriving av intendert såkornfunksjon (t.d. korleis prosjektet kan fremme fag- eller praksisutvikling og peike fram mot publisering og/eller eit framtidig prosjekt)
• Tidsplan for gjennomføring
• Plan for formidling

Ein kort prosjektrapport vert sendt til Polyfon seinast 31.12 det året ein får stipend.

Vi oppmodar alle studentar med sommarstipend til å dele funn og erfaringar på framtidige Polyfon-konferansar (følg med på konferanseutlysing / call for papers).